香港新浪網 MySinaBlog
小羚羊 | 28th Jun 2014 | 一般 | (37 Reads)

星期四如常到那處吃早餐,埋單$23,我攞咗$30出嚟,預備贖番$7

我攞住張單同銀紙出去俾錢時,有個伙記見到,爭住嚟收錢,我覺得有啲奇怪!?

佢喺柜桶摷咗三個兩蚊同一個一蚊俾我,我照例睇吓!發現個一蚊銀並非港幣,係某個地區嘅一蚊銀,價值當然少過港幣啦,我於是俾番個伙記,並說:咦…呢個都唔係一蚊!

佢都醒水,一言不發,即刻換番港幣俾我!

我或者諗多咗:佢可能見我要找贖,於是搶住找錢俾我,趁我唔唯意收咗個non-HK$

第二個可能會趕時間收咗走人,我絶對唔會囉!因為以前都試過俾人揾笨,固此以後一定會當面驗收!

我都算係熟客吖,咁都想揾我笨!?以後都係少啲嚟幫襯!!

有時收到啲發mo或者生锈嘅硬幣,都會盡快用咗佢,因為有啲店舖唔肯收呢類硬幣!所以我每次找贖都會睇清楚!

有時為了免卻麻煩,我會俾exact amount 或者用八達通。


小羚羊 | 24th Jun 2014 | 一般 | (26 Reads)

早一段時間,公司大廈嚟咗個「石嬌」,唔醒目、成碌木!

之前嗰個遠遠見到你,已經幫你掀定部lift。但而家呢個只係識叫人早晨,又唔會幫人掀lift

記得有一次,我將近行到升降機,眼白白睇住兩部lift關門,而個「石嬌」只係企喺度,仲笑笑口同我講:又會咁啱嘅,兩部lift一齊閂門!

我當時谷住度氣,唔望佢又唔睬佢!心諗:無厘醒目!

後來可能有人點醒咗佢,佢見到人多入lift,都會掀實部lift,唔再戇居居企响度!

有啲看更都好抵讚,唔係個個咁懶!

我住嗰座大廈嘅夜班看更,見你行到大閘,已經幫你掀開度鐵閘,又幫你掀埋lift,佢仲記得啲住客住邊層樓,認真利害!真係要俾幾個like佢!!

所以,保安啲質素及水準真係好參差!


小羚羊 | 21st Jun 2014 | 一般 | (30 Reads)

我又出現啦!見到我,梗係爆人哋啲衰嘢啦!今次火得滯,不吐不快!! 

今日與一班姊妹去吃下午茶,真係一肚氣!!

我哋各人落咗order,但係佢哋杯餐茶嚟晒,唯獨我無!!似乎唔對路,問吓個侍應,才知道漏咗單!再等多數分鐘,佢哋啲主菜嚟晒,唯獨我無,心諗可能我嘅焗意粉,要等耐啲!但係過咗數分鐘,又係唔對路,於是問吓個侍應,原來又係漏咗單!佢叫我不如改炒嘢,因為會快啲,但係我決定等多十分鐘!

過咗十五分鐘,都未見影,於是再問個侍應,佢即刻拎嚟!只見焗到有啲燶,啲肉又乾又硬,可能佢忘記咗,焗過龍!!我費事叫佢換過,快啲食完走人,因為其他人已經食完,唔想阻住佢哋啲時間!

仲有,其中一個姊妹嘅紅豆冰,佢話啲豆有啲酸,後來換咗中湯。

呢間茶餐廳啲侍應,由頭到尾,連一句道歉都欠奉,差到痺!

我肯定將佢blacklist!都未見過啲侍應,同老闆倒米!!

今朝見到個姊妹,佢一味向我道歉,因為係佢提議我去噚日嗰間茶餐廳食嘢,累我食啲又乾又硬嘅…我話:都唔關你事!

其實我係想班廢柴侍應道歉,而唔係佢呢!!


小羚羊 | 30th Dec 2013 | 一般 | (18 Reads)

今日喺藥房聽到個店員,同個阿婆講:你可以攞返去銀行換,噚日新聞已經講咗啦!阿婆似乎好閉翳,佢話屋企有好多呢啲金牛!

店員開玩笑:就嚟新年,用嚟封利是囉!可以俾封我架~~~

好彩藥房仲肯收大牛,否則都幾唔方便!

後來喺間麵包店,見到張貼通告:唔收大牛及金牛!客人話駛乜咁驚青?店員話如果收到張假大牛,都唔知要賣幾多個麵包,先可以賺番!!

雖然話2003年出問題啫,或者過幾日,其他年份都…所以,而家真係聞「牛」色變!

講開紙幣,家姐上個月喺街市,矇查查收到張陳年舊版嘅廿蚊紙,超市及街市啲阿姐唔肯收,佢唯有攞番去銀行處換!銀行職員攞住嚟睇一大輪,可能張紙幣太舊又有啲爛呱!心諗:又唔係假嘅,面額又細,駛乜咁緊張!?

以後找贖,都要睇清楚,包括一蚊硬幣,因為有時啲人,會混埋其他貨幣。家姐收過人民硬幣,我就收過朝鮮硬幣!算啦,就留嚟作紀念品罷!


小羚羊 | 29th Dec 2013 | 一般 | (24 Reads)

某天同班朋友到茶餐廳吃下午茶,傾起有間餐廳,堂食要收多兩蚊,反而外賣不另收費用!聽落都有啲反常,因為大部份食店,外賣通常收多一至兩蚊。 

呢間餐廳嘅理由,係堂食要洗碗筷义匙,嗰兩蚊係洗碗費!咁都有!?呢個理由都幾實際!我隨即建議朋友,下次堂食自備餐具!(純屬攪笑)

 反過嚟諗,外賣應該收客人平啲,因為佢唔佔你地方,而家啲舖租咁貴,真係有你(食店老闆)着數!

小羚羊 | 22nd Dec 2013 | 一般 | (28 Reads)
昨天聽收音機,主持人提及要成功應付job interview,只需熟悉十個英文字,講得幾咀,就無往而不利:buy low, sell high, collect early, pay late, avoid tax有趣!有趣!求其精一瓣,公司都有錢賺()囉!如果全部都精,不如自己做老板啦!旅行社係collect early,預早收晒客人啲團費,可以一年後找酒店條數,年中有大筆流動資金,攞嚟投資,確實和味!但係一旦投資失敗,隨時執笠!

小羚羊 | 21st Dec 2013 | 一般 | (18 Reads)
某天早上,上完課回家途中,行在旁邊的壯碩青年,突然大喊一聲,隨即坐在地上,原來他踏中一口釘!他當時穿着波鞋,鞋底應該頗厚,但竟然也被釘刺穿,直插腳底,可想而知,那口釘有多麼長及利!!emotion在前方不遠處,有一間專收廢鐵廢紙的店舖,想必是運送廢鐵時,不經意地遺留下來的鐵釘!!真是很險,我幾乎是中招的一個!emotion以後都是盡量避免走近這類店舖,就算經過,都要打醒十三分精神、頭耷耷、金精火眼注望地面,免得中招!emotion希望大家出入平安!

小羚羊 | 19th Dec 2013 | 一般 | (21 Reads)

常常聽到出名的茶餐廳,例如:X島,X華,價錢雖然昂貴了一點,但總想試一次,結果都是大失所望!

「X島」所有早餐都是三十大洋,比一般餐廳貴!那天踏進餐廳,感覺地面有點濕滑,枱椅有點「立」,店小二俾人感覺「唔憂做」,禮貌及誠意欠奉!我點了一客羅宋湯通粉+芝士火腿餐包+出名的奶茶。湯辣了一點,其他都是一般,沒有驚喜!無下次!!

「X華」更糟!特色早餐:豬仔包完全唔脆,餐肉勁鹹,炒蛋無蛋味,奶茶淡而乏味,快餐店還比它好!咁 嘅貨色,都要收$31!奇怪,門口排滿食客等位!!

我都唔算係奄尖咀刁,但完全無任何驚喜!!


小羚羊 | 19th Dec 2013 | 一般 | (14 Reads)
今天是新一的天,試試在此定居一段時間,看看是否適合!emotion

小羚羊 | 19th Dec 2013 | 一般 | (5 Reads)
如果你可以看到這篇文章,表示註冊過程已經順利完成。現在你可以開始blogging了!